اللغة العربية الفصحى: لغة علم، تواصل أو قداسة؟ أو ولا وحدة؟

من نحنا وزغار تعودنا نتعلم ونكتب ونقرا باللغة الرسمية الوحيدة: الفصحى. موضوع هيدي اللغة دايمًا بثير الجدالات والنقاشات السياسية والأيديولوجية والمشاعرية وكل شي ممكن يتعلّق بالهوية، خصوصي ببلاد المشرق المنوّعة بمزيج شعوبها ولغاتها التاريخية.

"اللغة المثالية"، "الإعجاز اللغوي"، "أصعب لغة بالعالم"، "أصعب قواعد بالعالم"، "الفخامة والفصاحة"، "لغة الجدود"، "لغتنا الأصلية"، "لغة مُنْزلة من السما" هني من الاشيا اللي بينقالو عن الفصحى أوّل ما بينفتح نقاش لغوي بالمشرق. بس شو هو الشي المشترك بين هيدول العبارات؟ ولا وحدة منّهن صحيحة.

أوّل شي، باللغوية وعلم اللسانيات، في تحفّظ على موضوع تقييم لغة واعتبارها متفوّقة وأرفع مقامًا من غيرها، لأنو عُلما اللسانيات واللغويين (الشاطرين) شغلتهن يشوفو اللغة بعدسات وصفيّة ومتجرّدة ويدرسو طريقة استعمالها بالحكي والكتيبة بالوتيرة الطبيعية وكل شي تابع للتقييم والمقارنة النوعية هو مش موضوعي ولا علمي ومن نسج خيال الانسان، وخاضع لحسابات اثنية وعرقية وسياسية واجتماعية وأكتر شي متطابق مع موضوعنا هون، دينية.

اللغة العربية الفصحى، بكل وضوح، هي لغة من عيلة اللغات الساميّة اللي بتضم السرياني، الآرامي، الكنعاني، العبري، الأمهري وغيرها وبالتحديد هي من اللغات السامية الغربية الوسطى. ظهرت بين القرن الأول والرابع ميلادي، وأقدم أثر مكتوب لإلها بالعربي القديم منعرفه اليوم اتلاقى بالنمارة وبيرجع لسنة ٣٢٨ ميلادي. ومع الوقت تم اختيار لهجة قبيلة قريش من هيدي العيلة اللغوية لتكون هي على راس الهرم وتتسمّى هي لغة العرب وصار في ادعاء لاعتبارها الأصل ولغة مقدسة، بس بالواقع، هيدا الاختيار ما كان إلّا صدفة جغرافية ضمن منطقة عربية متعددة الألسن ضمن العيلة اللغوية الوحدة.

قال المؤرّخ محمد بن جرير الطبري:

كانت العرب وإن جمع جميعها اسم أنهم عرب، فهم مختلفو الألسن بالبيان متباينو المنطق والكلام

بالفعل، ما اهتمّو اللغويين العرب القديمين (المش شاطرين) بلغات الجيران، السامية الجنوبية، لي كانو كمان عرب، وبيمتدّو للحبشة، لأنّهن اعتبروها لغات رديئة والشغل عليها عبارة عن تضييع للوقت مع انّو السامية العربية الجنوبية الأرجح انّها تكون أقدم من القريشي لغة الإسلام، وبالتالي ممكن نناقش انو هي اللي بتستاهل ضمن هيدا المنطق السخيف تتسمّى اللغة العربية المثالية.

ممكن نناقش كمان انو هيدا كلّه مش عمل لغوي وانو هيدي العقلية المش عقلانية بعدها متداولة اليوم على ألسنة الناس، بس نسبةً للهجاتنا العاميّة اللي برضو تُعتبر رديئة والشغل عليها عبارة عن تضييع للوقت مع انّو أصولها الممزوجة الهجينة الأرجح انّها تكون أقدم من القريشي لغة الإسلام. الهدف من هالحجج مش التهجم على الدين، بل الحث على توقيف التهجّم على اللغات المهمّشة لأسباب غير عقلانية وعلمية.

من بعدها، مفهوم "أصعب لغة وقواعد بالعالم" هو نسبي، وبيرجع لكل انسان اللي عم يتعلّم ولغته الأم والعيلة اللي بتنتمي لإلها لغته. الآشوري (لغته سامية) ما رح يلاقي صعوبة بتعلّم الفصحى (لغة سامية) ورح يتعذّب بالصيني (لغة صينو-تبتية)، متل ما الهولندي (لغته جرمانية) رح يتعذّب بالعربية الفصحى (لغة سامية) ويتألّق بالألماني (لغة جرمانية) اللي حيتعذّب فيها السعودي (لغته سامية). النسبية بتحكم الكون، وينك يا آلبرت؟

آخر شي، بحب قول انّي بحب اللغة العربية الفصحى، اللي استُخدمت لكتابة روايات وتحف ادبيّة عظيمة، واللي عبرها، للصدفة الجيو-سياسية خلال العصر العباسي، اتحافظ على علم ومعرفة الانسان المتطور وورّتتنا الفلسفات اليونانية والفارسية والصينية وغيرها من الفلسفات اللي كانت ضاعت واللي كوّنت انساننا التقدمي اليوم.

بس الفرق انّي بحب هيدي اللغة لأنّها مجرّد لغة، من لغات الكرة الأرضية، ومش أبعد من هيك، ومش بحاجة لأبعد من هيك لنحب لغة. الفصاحة والفخامة مش احتكار لحدا، لغتنا العامية، لهجاتنا كلّها ولغات الشعوب كلّهن لو وين ما كان موقعهم الجغرافي ووضعهن الاجتماعي ممكن يكونو أدوات للتعبير المعقّد والمزخرف للابداع اللغوي.

المهم كل واحد يختار أداته للتعبير، ويعطيها كل احترامه، لأن كل اللغات سواسية بقدر ما كل البشر سواسية.