اسأل ابوك ولا تسأل حكيم

انا وأبو النبل

مرة كنت بالسيارة مع ابوي بالطريق عالشغل، وفي موضوع كان محيرني، وصرلي فترة بفكر في. فلفيت عأبوي وفجاءة سالته: بابا، المسيح حكى "اِسْأَلُوا تُعْطَوْا. اُطْلُبُوا تَجِدُوا. اِقْرَعُوا يُفْتَحْ لَكُمْ.[١]" وانا في كتير أشياء بدي إياها، ومش حاب اطلبها من حدا

اتطلع علي، ضحك، ورد علي بجواب غير كل حياتي: "يسوع قصده اطلب من الله، مو من الناس، عمرك ما تطلب اشي من بني آدم"

وفعلا، نزلت من السيارة وفتت عالشغل، حطيت السماعات وبلشت افكر وبلشت فعلا اسأل الله واطلب منه أشياء (اللي معظمها كان أشياء مادية). المهم، قلت خنشوف شو رح يصير معنا

بعد فترة، رجعت الرغبة فيي انه خلص بدي هاي الأشياء، زهقت، اضايقت، انه خلص بدي اطلبها من الناس، قرفت وانا استنى. بعدين، خطوة بخطوة، من خلال قرائاتي، ومعرفتي بناس جداد بحياتي، صدفت انه كل اشي كنت بطلبه طلعلي بالكتب اللي بقراءها والمواضيع اللي كنت افتحها مع الناس الجداد، واكتشفت انه حياتي بتكون احسن بدون هاي الأشياء اللي كنت اطلبها! وفعلا لو اخدتها، كان حياتي بتكون اسوء

انصدمت

فرجعت، شكرت الله، وصرت اطلب من اول وجديد، بس هاي المرة طلبت اشي واحد: "اعطيني اللي بتشوفه كويس". وفعلا، الله فتحلي أشياء جديدة بحياتي خلت حياتي قوية، سعيدة، وبسيطة

،كيرياليسون

ادمون

[١] Κἀγὼ ὑμῖν λέγω, αἰτεῖτε, καὶ δοθήσεται ὑμῖν· ζητεῖτε, καὶ εὑρήσετε· κρούετε, καὶ ἀνοιγήσεται ὑμῖν· (ΛΟΥΚΑΝ 11:9)