خذو الحكمه من افواه الحلاقين

عيسى الحلايقة مش بس حلاقي من وانا عمري نص سنة، بل كان حلاق سيدي (ادمون الاول) وحلاق ابوي، وبدون مبالغة حلق لكل شباب عيلة الشامي

كل أسبوع بس اروح عنده، بنبسط من كل قلبي، شخص رائع وبني آدم حكيم لالله وبعرف كل تاريخ عيلتي. يعني والله يا اخي تحكي معه احسن بالف مرة من ما تحكي مع دكتور جامعة. ازا ادايقت، انفلق، مش فارقة عندي

الحلو انه كل أسبوع بتعلم منه حكمة جديدة، وحبيت احكي عن اكتر الحكم اللي علقت براسي

١) الخايف عليه، قاعد عليه: عمه عيسى كتير بني آدم رايق ومستحيل يكون متوتر، وبالنسبة اله الناس اللي بتتوتر ومعجوقة بحالها ناس خايفة واخريتها تاكل الخازوق اللي خايفة منه

٢) اسمعوا اقوالهم ولا تفعلوا افعالهم: عمه عيسى مسلم، لكن معظم زباينه مسيحية، وهاي المقولة هي من الإنجيل لكن سياقها غير، بس مش مهم، احنا المسيحية بهمنا السياق، مش الحرفية. وهاي المقولة تستخدم لما بدنا نحكي عن رجال الدين، يعني لازم انه بس نسمع شو بحكو من الكتاب، بس ما نعمل شو بعملوا بحياتهم، زي الاحتيال عالناس، ونستخدم الدين فالسياسة وغيره من الهبل تاع رجال الدين

٣) ما زاد الكره بين الناس غير الناس "المتعلمة": عمه عيسى بحب يكون جو المحل عنده جو لطيف، وبكره لما يجي زبون "مثقف" ويبلش اهت علينا بأفكاره ويسوق فيها انه بفهم اكتر من غيره. وفعلا، الناس البسيطة ومش متعلمة لاكنها حرفية احسن بالف مرة من واحد تعليمه مزور ومغشوش واللي هو الحال في مجتمعاتنا. بدك اكبر مثال؛ شوف الوزراء بالبلد واكمن واحد منهم متعلم برا وشوف وين ودو البلد

٤) بدك تقتل زلمة؟ قعده بالدار: هديك المرة بسأله: مش ناوي تتقاعد، كبرت يا عمه. اتطلع علي، ضحك وقلي: انا امنيتي اموت عرأس عملي. وحكالي انه القعدة بالبيت وفكرة التقاعد فكرة سيئة، وانه الشخص بكون مبسوط اكتر ازا كان شخص منتج، مش قاعد طول نهاره وبس بسوليف. وحكالي اجدادنا كان حلمهم انه يموتو بمعركة او يومت موتة نبيلة، وصار يتمصخر عشباب هالجيل اللي حلمهم يقعدو بالبيت

٥) المديون والمنيوك ما بنسوا: معناتها ازا داينت حدا مصاري واجيت تطلبهم بوقت سدادهم، بعملوا حالهم ناسيين، بس هم بتناسوا، نفس الاشي المنايك

٦) الناس التقال دم زي الدبانة وقت الغدا، ما بتخرب اشي، بس بتقلب المعدة: هون قصده عن الجيران اللي ما بتإزي حدا، بس زنخين، مع انهم ما بإزوك، بس لما تشوفهم بتنكد

٧) الاكبر منك بيوم افهم منك بسنة: عمه عيسى بضل يحكي انه عمرك ما تاخد نصيحة من حدا جيلك، دايماً اسأل اهلك او الكبار الخبرة بالموضوع. هادول بتمنولك الخير، وهاي من احسن الاشياء اللي جد، بتفيدك بحياتك

في كتير من هالمواضيع اللي منحكي فيها كل أسبوع، وإنشالله بشاركم بكمان حكم بالمستقبل

ً،نعيما

إدمون