ليش السّنه الكبيسه إسما كبيسه؟
شرش الكلمه هون سرياني، ܟܒܰܫ كْبَش، وإلو معاني كتار. بس في معنيان فيها تتفسّر الكلمه عن طريقن:
- المعنى الأوّل: سَرق أو نقّص، وهالشّي بيرجع لحقيقة إنّو كلّ سنه "بينسَرَق" أو بيتنقّص منّا ربع يوم ليرجعو ينلزقو كلّن بهالسّنه الكبيسه.
- المعنى التّاني: كَبَس أو دَحَش، لأن هالرّباع بيرجعو بينكبسو أو بيندحشو بفرد سنه، وهالمعنى هوّي هلّي بيرجّحو المرجع (سميث 1902).
معاني تانيه لهالفعل — الموجود كمان بلهجة لبنان الآراميّه — هنّي ضَغط، دَعَس، قَمع، ظَلَم، أو عِمِل كَبيس عن طريق حفظ الخُضرا بالخَلّ. فكلمة كبيس يعني المكبوس، متل ما المكدوس يعني هلّي بيجي مكدّس، الفرق إنّو الكلمه الآخراني تركيبتا عربيّه (مَفْعول).
نْزَكَرِت السّنه الكبيسه بقاموس "لسان العرب" [شوفـ(ي) الصّور تحت] وتْعَرّفت عإنّا كلمه بيستخدموها أهل الشّام وماخدينا من الرّوم (البيزنطيّي)، هالشّي بيأكّد أصلا السّرياني كونو كمان بالسّرياني بيقولو "شَاتُا كْبيشْتُا".
Comments
Post a Comment